大型內銀 穩陣收息之選

踏入6月，唔少投資組合都會推出半年結，介紹投資持倉嘅表現。工程部Simon噚日就同曉陽講，自己跟住某某投資組合入貨，上半年竟然賺咗唔少。

曉陽於是就八卦吓，到底買咩組合咁威威。原來Simon買入唔少內銀股，因為年初有唔少投資推介都話，當時嘅內銀現價吸引，而且股息夠高，值得投資。

的確，如果喺年初買入，到年中嘅時候，內銀的確升咗唔少，如果當時趁高位減持，回報可能有接近20%；即使無套現，等收息都係一個好選擇，因為息率分分鐘超過7厘，係一個唔錯嘅收息選擇。

如果比較幾隻內銀，邊隻最吸引？

以建行（00939）、中行（03988）、農行（01288）、交行（03328）同工行（01398）幾隻比較大嘅內銀比較，建行以8.54厘息率稍稍跑出，因該行股價早前走弱所致。雖然建行股價今年以來升逾半成，但對比交行今年以來18.26%升幅，兩者相差13.16個百分點，有追落後潛力。

至於比較內銀業績，交行股東淨利潤有246.33億元人民幣，按年增加5.63%，係5大內銀當中表現最好，所以該股股價今年以來累計升幅最多，證明市場資金的確係聰明錢。

而入場費最低嘅農行，以及派息增加5%嘅中行，都獲大行唱好，給予買入評級，目標價分別係3.92元同4.02元，距離現時股價有一段距離，有一定潛在上升空間。

不過，回歸核心問題，買內銀，到底係為收息定為股價升跌？內銀並唔會有股價急升翻倍嘅情況，如果大家一心要收息，內銀幾時都啱買。

（本欄逢周四刊登）